NAGA CITY- Dead on arrival an sarong persona mantang irido man an saro pa makalihis na mabangga nin van an motorsiklong nilulunadan kan mga biktima sa kalaban kan tinampo sa Barangay Bukal Pagbilao Quezon.
Binisto an nagadan na si Sofroño Merene, 50 anyos mantang irido man si Russel Cabula, 39 anyos, driver kan motorsiklo.
Sa nakuang impormasyon kan Bombo Radyo Naga, napag-araman na binabagtas kan motorsiklong minamaneho ni Cabula asin kan backrider kaini an kalabaan kan tinampo sa nasambitang lugar kan magliko ini asin biglang nabangga kan van na minamaneho man ni Jaime Monteloyola Jr, 46 anyos.
Huli digdi, nagsapo nin lugad sa manlaen laeng parte kan saindang lawas an mga biktima na tulos man na pigdalagan sa ospital alagad ideneklarar nang dead on arrival kan mga doktor si Merene.
Sa ngonyan, nagpapadagos pa nanggad an imbestigasyon kan mga otoridad manungod sa nasambitang pangyayari.
