NAGA CITY- Gadan an sarong lalaki mantang irido man an saro pa makalihis na pagbabadilon an mga ini kan limang armadong mga kalalakihan sa New Zigzag Road sa Barangay Silangang Malicboy, Pagbilao, Quezon.
Binisto an nagadan na si Jun Jun Tañafranca mantang nairido man an sarong 16-anyos na solterito.
Sa nagunong impormasyon kan Bombo Radyo Naga, napag-araman na binabagtas kan tricycle na minamaneho ni Tañafranca an kalabaan kan tinampo sa nasambitang lugar kan biglang nag-abot an suspek na si Ricky Ballesteros kaibanan an apat pang mga kalalakihan.
Sa dae pa maaraman na rason, bigla na sanang pinaputukan kan mga suspek an biktima na nagresulta sa tulos na kagadanan kaini mantang nagsapo man nin lugad sa saiyang braso an solterito na lunad kan tricycle.
Maswerteng nakasalbar man an duwa pang lunad kan tricycle na sinda Paolo Tañafranca, 32-anyos asin Jundel Gernada, 18-anyos.
Nagpaparahay pa man ngonyan sa ospital an nairidong solterito mantang padagos pa an imbestigasyon kan mga otoridad para madakop an nagdurulag na mga suspetsado.
