NAGA CITY- Gadan an sarong lalaki mantang nagtitinir pa man sa ospital ang saro pa makalihis na mahgop kan sarong truck an nilulunadan nindang tricycle sa Unisan, Quezon.
Binisto an nagadan na si Rodrigo Abad, 62-anyos mantang nairido man si Norma Nartia, 58-anyos.
Sa nakuang impormasyon kan Bombo Radyo Naga, napag-araman na binabagtas kan tricycle na minamaneho ni Abad an tinampo sa barangay Tubas kan mahagop ini kan nag-overtake na truck na kargado nin semento.
Nakalasik pa suboot si Abad hale sa minamaneho niyang tricycle asin naligis pa kan truck na nagsapo nin malalang lugad sa saiyang payo asin lawas na nagresulta sa saiyang tulos na kagadanan.
Idinalagan man sa ospital an pasahero kaini na si Nartia makalihis na magsapo nin lugad sa saiyang lawas.
Tulos man na nagdulag an dae pa nabibistong driver kan nasambitang truck na padagos pa ngonyang pighahanap kan mga kapulisan.
