NAGA CITY- Gadan an sarong motorista mantang kritikal man an kamugtakan kan backrider kaini makalihis na mabangga asin maligis pa nin lunadan sa Atimonan, Quezon.
Binisto an nagadan na si Wilfredo Alcantara, 54-anyos mantang irido man si Jern Hally Tuazon, 20-anyos.
Sa nagunong impormasyon kan Bombo Radyo Naga, napag-araman na binabagtas kan motorsiklo na minamaneho ni Alcantara an tinampo sa barangay Balubad kan aksidente ining mahagop kan dae pa maaramang klase nin bihikulo.
Huli digdi, nakalasik pa suboot an nasambitang motorsiklo siring man an duwang lunad kaini.
Aksidente man na naligis nin pampasaherong Philtranco bus na minamaneho ni Manolito Pontipedra, 38-anyos an biktima na si Alcantara.
Naidalagan pa kuta na kan nagrespondeng mga otoridad sa ospital an duwang lunad kan motorsiklo alagad pigdeklarar na ining dead on arrival kan mga doktor si Alcantara mantang kritikal man an kamugtakan ni Tuazon na padagos pang pigbubulong hasta sa ngonyan.
Nagtitinir na ngonyan sa kostudiya kan mga otoridad an driver kan nasambitang pampasaherong bus mantang nagpapadagos pa an imbestigasyon sa pangyayari.
