NAGA CITY – Saro an gadan asin nawawara mantang sarong parasira an nakasalbar makalihis maglubog an bangka sa kadagatan kan Caramoan Camarines Sur.
Sa entrevista kan Bombo Radyo Naga ki PCPT. Jennifer Kristine Galang- Acting Chief of Police- Caramoan MPS pigsasay kaining an mga parasira naglayag gikan sa San Andres, Catanduanes, na huli sa kusog kan uran asin alon nagtaob an bangka.
An nakasalbar asin an gadan sa insidente presenteng yaon sa Barangay Gogon, Caramoan Camarines Sur.
Mantang makusog pa an alon sa lugar kun nagigin masakit sa mga awtoridad an pagrescue sa survivor asin sa nagadan na biktima.
Alagad pig-secure man kan mga opisyales kan Gogon an labi kan gadan.
Apwera kaiyan pigigibo man an gabos kan mga awtoridad na maisalbar pa ining sarong nawawara.
Mientrastanto puon kan nakalihis na aldaw hasta kasuudma talagang makusog na an pag-uuran asin may pagtaas na kan lebel nin tubig sa kadagatan.
Nagpaluwas man nin abiso an PCG na “No Sailing Policy” alagad pigtutubudan man na dahil sa gikan pang Catanduanes an mga parasira pupwedeng dae soboot nakaabot sa sainda an abisong ipigpaluwas.
Sa ngunyan pighahalat na sana an pagkalma kan dagat para maisagibo na an search and rescue operation katuwang an MDRRMO asin Local Government Unit of Caramoan.
Pig-abisuhan man ni Galang an mga parasira na inuton an kasalbaduhan asin padagos na i-monitor an panahon antes maglayag.
