NAGA CITY- Gadan an sarong persona mantang irido man an 15 iba pa makalihis na makabangga sa truck an sarong pampasaherong bus sa banwaan nin Pamplona, Camarines Sur.
Sa entrevista kan Bombo Radyo Naga ki P/Insp. Gregorio Bascuña, Jr., hale sa PNP Pamplona, enot suboot na nagsalpok sa sanga nin kahoy an pampasaherong bus na minamaneho ni Ernesto Canares, 59-anyos kaya man nagpagewang-gewang ini sa tinampo sa barangay Tambo.
Nagsalpok pa suboot an nasambitang bus sa nakaparadang truck kaya man haros narukmi an tuong parte kaini.
Sigon ki Bascuña, tulos man na naidalagan sa ospital an 16 mga lunad kan bus kabale na an driver asin konduktor alagad pigdeklarar ng dead on arrival kan mga doktor an pasaherong si Milandro Nieva, 68-anyos na hale sa Virac, Catanduanes.
Napag-araman na pasiring suboot sa Tabaco City an nasambitang bus kan mangyari an aksidente.
Sa ngonyan, nagtitinir na sa kostudiya kan mga kapulisan an driver kan bus mantang inaandam na an kasong isasangat laban sa saiya.
