Padagos pang nagpapabulong an haros 20 mga pasahero kan sarong pampasaherong jeep makalihis an nangyaring aksidente sa boundary kan banwaan nin Libmanan asin Sipocot, Camarines Sur pasado alas-kwatro nin pagkahapon.
Sa nagunong impormasyon kan Bombo Radyo Naga, napag-araman na nakapundo suboot an pampasaherong jeep na pigmamaneho ni Joefel Elevado sa Barangay Beguito Viejo sa banwaan nin Libmanan sa rason na naka-red an traffic light sa ginigibong road reblocking sa lugar kan bigla na sana ining budalan sa likudan na parte kan sarong 10-wheeler truck na pigmamaneho man ni Alfred Algarme.
Huli digdi, nawaran nin kontrol sa behicolo si Elevado rason para magtagilid ini asin haranihan pang mahulog sa bangin sa naunambitan na lugar.
Tulos man na idinalagan sa ospital an 19 na lunad kan jeep kabale na an driver kaini alagad binawian suboot nin buhay an saro sa mga pasahero kaini.
Marikas man na duminulag an driver kan nakabudal na truck na si Algarme.
Nagpaparahay pa ngunyan sa ospital an mga nalugadang biktima mantang padagos pa man pighahanap kan mga otoridad an duminulag na driver na posibleng mahampang sa kasong reckless imprudence resulting to homicide, multiple physical injuries asin damage to properties.
