NAGA CITY- Padagos pa nanggad an pigkokonsiderar na search and rescue operation kan mga otoridad para mahanap an sarong lalaki na nawawara makalihis na maglubog an sarong motorized banca sa barangay Mapid, Lagonoy, Camarines Sur.
Sa entrevista kan Bombo Radyo Naga ki SPO3 Alvin Alvaran, hale sa PNP Lagonoy, alas-11:45 nin aga kan Marso 10 kan naglubog suboot an motorized banca na nilulunadan ninda Allan Baao, 39-anyos; Alex Mabag, 32-anyos; Arwin Mabag, 30-anyos asin si Ariel Abainza, 29-anyos sa kadagatang sakop kan nasambitang lugar.
Posibleng huli suboot sa makukusog na hukol sa kadagatang sakop kan barangay Mapid kaya naglubog an nasambitang baroto.
Maswerteng nakasalbar sa pangyayari an mga lunad kan baroto na sinda Alex asin Arwin Mabag siring man si Abainza alagad padagos pa nanggad na pighahanap an nawawarang si Baao.
Sigon ki Alvaran, posibleng overloaded an motorized banca huli ta apwera sa apat na personang lunad kaini, kargado man suboot ini nin mga cabilla na dadarahon kuta na sa barangay Balaton sa parehong banwaan.
Sa ngonyan, sigon sa opisyal, padipisilan pa nanggad an saindang ginigibong search and rescue operation huli sa maraot na kamugtakan nin panahon na namamatean sa lugar.
