NAGA CITY- Dae napugulan kan sarong Overseas Filipino Worker (OFW) na mahandal sa pigpapautob ngonian na voluntary repatriation kan gobyerno kan Pilipinas para sa mga Pinoy na nagta-trabaho sa Kuwait.
Sa pakikipag-olay kan Bombo Radyo Naga ki Ian Garchitorena, tubong Naga City asin presenteng nagta-trabaho sa sarong kompanya sa Kuwait, sinaysay kaini na sa limang taon niyang pagtatrabaho sa nasambitan na nasyun, mayo man siyang nagin problema puon sa saiyang mga katrabaho hasta sa saiyang employer.
Alagad sa ibong kaini, nahahandal suboot siya na tibaad pati sindang mga skilled workers madamay sa nasambitan nang repatriation.
Mientrastanto, mensahe man kaini sa saiyang pamilya sa Pilipinas na dae mahandal huli ta marhay man suboot an saiyang kamugtakan.
Dagdag pa kaini, nagkataon sanang minalas an ibang mga Pinoy na nakakua nin mga among mapang-abuso.
Enot nang kinumpirmar ng Philippine Overseas Employment Administration (POEA) na anas mga household service workers an nabibiktima nin pangma-maltrato sa Kuwait.
