NAGA CITY- Gadan an sarong dae pa nabibistong persona makalihis na mabiktima nin hit and run sa Pagbilao, Quezon.
Sa nagunong impormasyon kan Bombo Radyo Naga, napag-araman na pigbabagtas suboot nin sarong dae pa maaraman na klase nin bihikulo na pigmamaneho nin dae pa nabibistong persona an kalabaan kan tinampo sa New Zigzag Road, Sitio Upper Sapinit sa barangay Silangan Malicboy kan aksidente kaining nabangga an dae pa nabibistong persona mantang naglalakaw ini sa madiklom na parte kan tinampo.
Pigtutubudan na nagsasapo suboot nin problema sa saiyang pag-iisip an dae pa nabibistong biktima na natumba pa sa gilid kan tinampo.
Nagsapo nin lugad sa saiyang lawas an biktima na nagresulta sa tulos na kagadanan kaini.
Sa ngonyan, nagpapadagos an operasyon kan PNP Pagbilao para sa pagkakabistuhan kan biktima asin an pagkakadakop kan nagdulag na bihikulo siring man an pagkakaarestar sa driver kaini.
