NAGA CITY- Pigkokonsiderar kan Naga City Police Office (NCPO) na ‘big fish’ suboot pag-abot sa transaksyon nin iligal na droga an saro sa limang mga drug personality na sindang naarestar sa pigkondusir na anti-illegal drug operation kan Sabado, Agosto 11 sa Barangay Calauag, Naga City.
Sa entrevista kan Bombo Radyo Naga ki SPO2 Tobby Bongon, tagapagtaram kan NCPO, sinaysay kaini na an suspek na si Rosemarie Devela, 25 anyos an bagsakan nin pigpapangalad na bulong sa ciudad asin bulto-bulto man suboot an mga iligal na transaksyon kaini.
Dae man piggigilid kan PNP an posibilidad na kasabwat ni Rosemarie an saiyang mga tugang na sinda Michael asin Raymond Devela siring man an magtugang na sinda Jomalyn asin Judelyn Tocyapao asin an sarong menor de edad sa transaksyon kaini nin iligal na droga.
Sigon ki Bongon, kun dae tulos nakumpiskar kan mga otoridad an pigkakarkulong 80 grams o nagkakantidad nin haros P400,000 na pigtutubudang shabu sa harong ni Rosemarie sa St. Vincent sa Barangay Calauag, posibleng magpakol pa suboot sa milyon an street value kaini kun mapapasakamot na ini kan mga drug pusher.
Sinaysay ni Bongon na haloy na nindang pigmomonitor si Rosemarie na bistadong supplier nin iligal na droga asin enot na suboot ining nagsuko sa Oplan Tokhang kan PNP kaibanan an saiyang mga tugang.
