Saro na an nairehistrong binawian nin buhay huli sa paputok 3 na aldaw antes an pagsabat kan Bagong Taon.
Sigun ki Department of Health (DOH) spokesperson ASec. Albert Domingo, na an binawian nin buhay an sarong 78-anyos na lolo. Pigsindihan kaini an paputok na Judas belt na nagresulta sa pagsabog kaini kawsa kaya nagsapo ini nin multiple injuries. Pigdara pa ini sa ospital kan Disyembre 22 alagad binawian nin buhay kan Disyembre 27.
Sigun pa sa DOH, may iba man na helang an biktima.
Kabali an nagadan na indibidwal sa inisyal na 125 na kaso kan firecracker-related injuries na nai-rekord gikan sa 62 sentinel sites na binabantayan kan DOH puon Dec. 22 hasta kan alas-6 nin pagkaaga kan Sabado, Disyembre 28. Sa nasambitan ng numero, 24 an bagong naikurit na kaso.
Nasa 102 sa mga biktima an nasa 19 na taong anyos pababa mantang 23 man an 20 anyos palangkaw.
Pag-abot sa kasarian, 114 an mga kalalakihan mantang 11 an babae na nabiktima nin paputok.
Sigun pa sa DOH, 91 kaso o 73% an kawsa kan iligal na paputok siring kan boga, 5-star asin piccolo kun saen 75 digdi o 60% an aktibong naggagamit nin paputok.
