NAGA CITY- Gadan an sarong soldados mantang apat man an nairido sa nangyaring engkwentro sa pag-ultanan kan militar asin rebeldeng New People’s Army (NPA) sa banwaan nin Labo, Camarines Norte.
Sa entrevista kan Bombo Radyo Naga ki Col. Boots Regencia, deputy commander kan 902nd Infantry Brigade, 9th Infantry Division, Philippine Army, sinaysay kaini na nagbungkaras an bakbakan kan mag-apon nin improvised hand grenade an mga pinagtutubudang miyembro kan NPA sa patrol base kan mga militar sa Barangay Dumagmang.
Naghaloy nin haros sarong oras an riribayan nin putok sa pag-ultanan kan duwang lado na nagresulta sa pagkagadan kan sarong soldados mantang kritikal man an kamugtakan kan saro sa apat na nairido.
Nagpapadagos pa hasta sa ngonyan an pursuit operation kan 902nd IB laban sa mga nakadulag na rebelde na pigtutubudang kadakol man an nairido huli sa mga tagdo nin dugo na nawalat sa encounter site.
Paliwanag kan opisyal, CAFGU detachment an dating nakabase sa nasambitang barangay kaya dakula an posibilidad na nakubanan an NPA na mga regular na tropa na kan 902nd IB an saindang nakalaban.
Mientrastanto, sigon pa ki Rehencia, resulta an nasambitang bakbakan kan suboot “frustration” kan NPA sa kamawotan kaining makaibanan kan tropa kan gobyerno sa pakikipaglaban sa Maute group sa Marawi City na enot ng pigsayumahan ni presidente Rodrigo Duterte.
