Nagpuon na kan nakalihis na aldaw nin Domingo, Oktubre 26, an halabang taon nin pagdadalamhati kan yumaong reyna kan Thailand na si Queen Sirikit, ina kan presenteng hade kan Thailand na si King Maha Vajiralongkorn.
Magigirumduman na nagadan an reyna kan nakalihis na Biyernes sa edad na 93 anyos makalihis an pirang taon nin pakikipaglaban sa helang.
Kaibahan kaini, dinara na an lawas ni Queen Sirikit gikan sa Chulalongkorn Hospital pasiring sa Grand Palace sa Bangkok, kun saen ini ibubugtak sa laog mismo nin sarong taon antes na isagibo an cremation.
Katakod man kaini, Itom na kolor an isinulot kan mga namamanwaan kan Thailand, mantang ipinapahiling sa mga digital billboard an mga mensahe nin pakikidumamay.
Napagaraman na bistado si Queen Sirikit komo “Mother of the nation” huli sa saiyang mga gibong pangkawanggawa asin pagigin simbolo nin pagkakasararo.
Sa panahon kan saiyang pagkabubay, hinangaan ini kan mga banyagang mamamahayag asin pigparehas pa sa dating Unang Ginang kan Amerika na si Jackie Kennedy.
Mientrastanto, nagpaabot man nin pakikidumamay sinda Pangulong Ferdinand Marcos Jr. asin U.S President Donald Trump. Ipinagpapauktaba man ni Prime Minister Anutin Charnvirakul an biyahe kaini pasiring sa Malaysia tanganing makisumaro sa pagluluksa antes na magdagos para sa pagtinta kan peace deal sa ASEAN summit .
