NAGA CITY- Haros sabay na kinondusir kan mga otoridad an drug raid sa mga harong nin pigtutubudang imbwelto sa transaksyon nin iligal na droga sa ciudad nin Naga asin sa Bato, Camarines Sur.
Sa entrevista kan Bombo Radyo Naga ki SPO2 Toby Bongon, tagapagtaram kan Naga City Police Office (NCPO), sinaysay kaini na limang mga harong an saindang ni-raid subagong alas-2 nin mag-uumagahon sa Sagrada Familia, barangay Peñafrancia o mas bistado sa apod na ‘Isla Sison’.
Tolong persona an naaktuhan na naggagamit nin iligal na droga sa harong nin sarong Jake Cuaño.
Naarestar man an tolong iba pang mga suspek na sinerbehan nin search warrant.
Sigon ki Bongon, nakumpiskar sa nasambitang operasyon an sachet nin shabu asin drug paraphernalia.
Napag-araman na an ‘Isla Sison’ an bistadong balwarte nin iligal na droga sa ciudad nin Naga.
Mientrastanto, sa suway na pakikipag-olay ki PC/Insp Louie Manuel dela Peña, chief of police kan PNP Bato, sinaysay kaini na naarestar an mag-live in partner na sinda Mishrey Escobal asin Renato Otian siring man an sarong Joel Caballero subagong alas-4:30 nin mag-uumagahon.
Kabale sa priority target kan mga otoridad an mag-live in partner na sinda Escobal asin Otian.
An nasambitang operasyon kan mga otoridad parte kan Oplan Double Barrel Reloaded kan Philippine National Police (PNP).
