NAGA CITY- Salbado na an kamugtakan kan 11 persona makalihis na mabiktima nin food poisoning sa Calaguas Island sa probinsya nin Camarines Norte.
Sa entrevista kan Bombo Radyo Naga ki Romil del Moro, saro sa mga tour operator sa nasambitang isla, sinaysay kaini na idinalagan sa Santissima Trinidad Hospital sa banwaan nin Daet an 11 mga turista na hale pa sa Taguig City.
Nakaluwas naman suboot sa ospital an dae na pinangaranan na mga turista asin sinimbag man kan saindang mga tour operators an gastos sa pagpapabulong.
Pinahimutikan man ni del Moro an naenot na nagluwas na mga report na labi sa 20 persona an nabiktima nin food poisoning.
Sigon ki del Moro, hinihiling pa ngonyan kan mga otoridad an posibilidad na huli sa balon na beef tapa kan mga turista an rason sa nasambitang insidente.
Ini huli naman sa kabilugang 170 na mga turista solamenteng 11 sana an nabiktima kan food poisoning.
Sa ibong kaini, pigsierto man ni del Moro na nakaanda an mga tour operators sa Calaguas Island na magresponde asin magtao nin first aid sa mga turista enkaso magkaigwa nin anuman na remalaso o problema sa lugar.
