Dae mababa sa 113 an naarestar kan Manila Police Distric (MPD) makalihis an nagin girian sa tahaw kan pulisya asin nagkapirang grupo kan mga kajovenan sa nagkapirang parte kan Maynila siring kan Mendiola, Ayala Bridge, asin magin sa Recto.
Sigun ki MPD Public Information Office Chief asin Spokesperson PMaj. Philip Ines, gikan sa numero na ini, naarestar an 51 indibidwal gikan sa Ayala Bridge, 21 an naarestar sa Mendiola mantang 41 an naarestar sa Recto kun saen 65 an naarestar na nasa hustong edad na asin poco mas o menos 48 an menor de edad na Iyo man nakatalaang iturn over sa Reception Action Center kan Municipal Social Welfare and Development Office para sa kakaipuhanong intervention kan mga menor de edad.
Pwede man na mahampang sa mga patong-patong na reklamo an mga naarestar na pawang mga pagbalgar sa Batas Pambansa 880 o an Public Assembly Act, Illegal Assembly, resistance and disobedience to authority, arson, direc assault, serious physical injuries asin iba pang pagbalgar.
An mga indibidwal man na ini an presenting nasa kustodiya kan MPD asin isasairarom man sa mga medical tests tanganing maaraman kun igwa sindang nasapong lugar o ano pa man gikan sa nagin riot.
Basado kaya sa inisyal na imbestigasyon, igwang mga nakapreparar na kagamitan an grupong ini siring kan spray paint, motolov bomb, pintura asin pira pang mga kagamitan na posibleng pinondohan kan dae pa nabibistong personalidad.
Sigun ki Philippine National Police (PNP) Public Information Office Chief PBGen. Randulf Tuaño na pinagduduon soboot kan mga naarestar na nakaimpluwensiya sa mga kajovenang miyembero an soboot mga hiphop gangsters kun saen an mga ini sarong Filipino local Rapper tanganing puonan an pagribok.
Mantang nagluwas man nin mga pahayag si Manila City Mayor Isko Moreno Domagoso na posibleng dating politico, abogado, asin sarong businessman na miyembro kan filipino-chinese community an nagpondo sa nagin pag-aamok kan mga grupo kan kajovenan na ini sa manlaen-laen na parte kan Manila.
Nagkapira sana ini sa mga anggulo na pighihiling sa ngunyan kan PNP mantang ongoing man an nagigin suhay na imbestigasyon kan PNP asin kan MPD tanganing masierto na mapapanimbag sa ley an nasa likod kan nasambitan ng riot.
Sa ibong kaini, inihayag pa man kan Pambansang Pulisya na nagtitinir na generally peaceful an nagin mahewasang rally kan mga demonstrador kan nakalihis na aldaw nin Domingo asin an insidente soboot na ini an saro sanang isolated case na dae man naeksperyensiyahan sa ibang parte kan nasyon.
Padagos man na pig-aaram pa kun sisay pa an nakiparte sa nagin riot sa mga parting ini kan Maynila huli sa pagsisierto kan MPD, dae sinda mapundo hasta dae napapanimbag sa ley an mga nasa likod kan nasambitan ng kariribokan.
