Aram baya nindo mga ka-Bombo, nadiskubre sa Antique an watawat kan Pilipinas na pigkakarkulong nasa 127 taon na.
Katakod kaini, pig-enkaminar kan sarong local historian asin dating Antique provincial board member na si Errol Santillan an National Historical Commission of the Philippines (NHCP) na ideklara ini komo sarong national treasure.
Target man soboot ninda na magpasar nin resolution gikan sa Antique provincial board tanganing ideklara an watawat komo sarong importanteng historical asin cultural heritage asin mapreserba ini.
Sa presente, an watawat an nasa pangangataman kan pamilya ni 2nd Lt. Ruperto Abellon, an second-in-command sa Visayas sa irarom ni Gen. Leandro Fullon kan kasagsagan kan Philippine Revolution asin digmaan sa pag-ultanan kan Pilipinas asin Amerika.
Sigun ki Santillan, dinara an watawat asin piglangkaw sa Libertad, Antique komo parte kan armed expedition kan 1898.
Base man sa pagkakarumdom kan 79 anyos na maku-apo ni Lt. Abellon, naggikan sa Hongkong an watawat na dinara ni Heneral Emilio Aguinaldo kan magbweltada ini sa Pilipinas kan Mayo 19, 1898.
An sarong siglong watawat kan Pilipinas an igwa nin sukat na 53 pulgada an lapad asin 93 pulgada an laba, na yari sa espesyal na materyales.
Siring kan modernong watawat kan Pilipinas, igwa ini nin kulay asul, pula, asin puti asin igwa nin tolong bituon na nagsisimbolo sa tolong pangenot na island groups kan nasyon na Luzon, Visayas asin Mindanao.
