NAGA CITY- Mawot na i-recolate kan lokal na gobierno kan Naga an 13 pamilya na nakaistar sa laog kan Balatas Dump Site.
Sa entrevista kan Bombo Radyo Naga ki Engr. Joel Martin, pamayo kan Solid Waste Management Office-Naga, sinaysay kaini na susog sa ley, pinagbabawalan an mag-istar sa pig-aapod na close facility siring na sana kan Balatas Dump Site nin huli ta peligroso soboot sa saindang salud an kapalibutan asin pwede pang paggikanan nin kasulo.
Katakod kaini, sigun pa ki Martin, mapatabang soboot an LGU-Naga sa Barangay Kapitan kan Balatas tanganing maibalyo sa mas salbado na lugar an nasambitan ng 13 pamilya orog na ngunyan ta nagpapadagos pa man giraray an pag-aso sa lugar huli sa nagbungkaras na kasulo kasuarin sana.
Paliwanag pa kan opisyal, an basura dawa igwang kudal, igwa pa man giraray posibilidad na magkaigwa nin accidental fire huli sa labing init kan panahon na naeeksperyensiyahan sa presente.
Dugang pa ni Martin, dagos-dagos an saindang pagbabantay sa lugar tanganing dae na liwat pang magkaigwa nin kasulo nin huli ta peligroso an aso sa salud kan mga tawo na nakakaparong kaini partikularmente an mga pasyente asin staff na yaon sa General Hospital na harani sa lugar.
Sa ngunyan, hagad na sana kaini sa pamayuhan kan Balatas na makipagtabangan sa LGU-Naga tanganing dagusan ng maibalyo an nasambitan ng 13 pamilya para sa kasalbaduhan kan mga ini.
