NAGA CITY- Pigreport kan Police Regional Office Bicol na nagpakol sa kabilugang 132 na miyembro kan New People’s Army (NPA) an boluntaryong nagsuko sa kapulisan asin militar sa rehiyon sa enot na kabangaan kan taon.
Sigun ki PRO-5 Director Brig. Gen. Andre Dizon, an data nairehistro puon Enero hasta Hunyo 25 kan presenteng taon gikan sa anom na probinsiya kan Rehiyon.
Kasabay kan saindang pagsuko, an mga nasambitan ng miyembro kan NPA bitbit man an nasa 60 manlaen-laen na klase kan badil, 24 improvised explosive devices (IEDs), asin 2,727 na pidaso kan manlaen-laen na kalibre kan ammunition.
Sigun ki Dizon, an nasambitan ng trayumpo an resulta kan pinahigot na kampanya asin padagos na koordinasyon sa pag-ultanan kan PRO-5 asin Armed Forces of the Philippines.
Katakod kaini, pigheras man ni Dizon an mga lakdang tanganing magin matrayumpo an nasambitan ng programa ini soboot sa paagi kan mas pinahewas na komunikasyon asin presensiya kan kapulisan sa hararayo asin liblib na barangay kun saen an mga programa kan gobierno siring kan Enhanced Comprehensive Local Integration Program (E-CLIP) asin iba pang suporta para sa mga dating rebelde.
Pigsaysay pa kan opisyal na an implementasyon kan Retooled Community Support Program (RCSP) an mas pinahigot an mga programa na nakadesinyo partikular sa mga naapektaran kan insurhensiya.
Padagos man an pangapudan kan PNP Bicol asin Philippine Army sa rehisyon sa mga natatada pang miyembro kan mga komunista na magbalik loob sa gobierno asin akuon an asistensiya na itinatao sa sainda.
