NAGA CITY- Nasa marhay na kamugtakan na an 14 persona makalihis na maaksidente an saindang piglulunadan na pampasaherong van sa banwaan nin Lupi, Camarines Sur.
Sa nakuang impormasyon kan Bombo Radyo Naga, napag-araman na binabagtas kan van na minamaneho ni Joseph Dollero an kalabaan kan tinampo sa barangay Alanao sa nasambitang banwaan kan bigla na sana suboot magputok an duwang rida sa likudan na parte kan bihikulo.
Huli digdi, nawaran nin kontrol sa manibela an driver na nagresulta sa pagbaliktad kan nasambitang van.
Nagsapo nin lugad sa saindang lawas an 14 pasahero kan van na tulos man pigdalagan sa ospital.
Napag-araman na hale sa banwaan nin Daet, Camarines Norte asin pasiring kuta na sa ciudad nin Naga an nasambitang pampasaherong van.
Paramientras man na pigkostudiya kan mga otoridad an driver kan van mantang nagpapadagos pa an imbestigasyon sa pangyayari.
