NAGA CITY – Pigseselebrar ngunyan na bulan an 14th BJMP Community Relations Service Month sa Bicol Region.
Sa naging paghampang sa mga kagawad kan media ni Senior Jail Officer 3 Ruth Castor, PIO kan BJMP Regiona V, sinaysay kaini na sa nasambitan ng aktibidad, pig-enkaminar kaini an mga jail facility na maglatag nin mga tarpualins tanganing maaraman kan komunidad na nakikisumaro an BJMP sa siring na aktibidad.
Sigun ki Castor, magkakaigwa sinda nin Information Eductaion Campaign dapit digdi na nakapukos sa maraot na epekto kan iligal na droga – na saro sa saindang mahigot na pigkakampanya, orog na ta ini an halangkaw na numero kan krimen na yaon sa saindang pasilidad.
Malaog naman sa nasambitan ng kampanya an importansya kan sarong indibidwal sa paglaban kontra sa ipinapangalad na bulong asin krimen.
Apwera pa digdi, mapartisipar man sinda sa ikukundusir na one-stop shop kan PCRM.
Nasa mandato man kan saindang lado na magtao nin development programs asin an kasalbadohan kan mga PDLs.
Mientrastanto, pigtawan-duon man kan opisyal na dapat igwa nin pigsusunod na program an lambang PDLs tanganing magigin aktibo pa man an mga ini dawa nasa laog kan kulongan.
Sa ibong kaini, sa presente igwa soboot nin nakulong na 3,762 sa 29 jail facilities. Nasa 261 an mga babae digdi asin an mga lalaki an nasa 3,501.
