NAGA CITY- Arestado an sarong 17-anyos na solterito na sinasabing notoryus suboot na ‘arsonista’ asin pigtutukdong yaon sa likod kan serye nin mga panunulo sa banwaan nin Cabusao, Camarines Sur.
Sa entrevista kan Bombo Radyo Naga ki FO3 Judel Jeremias, hale sa Bureau of Fire and Protection (BFP) Cabusao, sinaysay kaini na naarestar an suspek sa ginibong pursuit operation poon subanggi.
An nasambitang menor de edad an pigkokonsiderar na notoryos na ‘arsonista’ sa saindang banwaan asin ini man suboot an yaon sa likod kan nangyaring apat na magkakasunod na kasulo sa saindang lugar subanggi.
An nasambitang menor de edad suboot an yaon sa likod kan haros 15 iba pang mga insidente nin kasulo sa saindang banwaan.
Sigon ki Jeremias, pig-ako man kan menor de edad an mga alegasyon laban sa saiya mantang sigon man sa pamilya kaini, igwang problema suboot sa saiyang pag-iisip an nasambitang solterito.
Sa ngonyan, nagtitinir na sa kostudiya kan Department of Social Welfare and Development (DSWD) an menor de edad asin nakatalaan ining sangatan nin kaso kan mga kabuhan kan BFP asin PNP.
