NAGA- Kinumpirmar ngonyan kan Philippine National Police (PNP) na igwang haros 20 mga barangay sa banwaan nin Libmanan an pigsairarom sa Category 2 kan election watchlist areas kan Commission on Election (Comelec).
Sa entrevista kan Bombo Radyo Naga ki P/Supt. Errol Garchitorena, hepe kan PNP Libmanan, sinaysay kaini na basado sa saindang nareresibeng mga impormasyon, igwa suboot nag-o-operar na mga armadong grupo sa 17 lugar na yaon sa upper barangay asin sarong lugar na yaon sa lower barangay kan saindang banwaan.
Pigsierto man ni Garchitorena na naideploy na an mga kasoldadusan sa manlaen laeng lugar sa nasambitang bayan para masierto an seguridad urog na ngonyan na maabot na Mayo 14 barangay asin Sangguniang Kabataan (SK) Elections.
Sa ngonyan, nasa normal pa suboot an sitwasyon sa saindang banwaan asin mayo pang nairerehistrong insidente nin pang-aabuso o pananakot sa mga kandidato makalihis an ikaduwang aldaw kan campaign period.
Napag-araman na maibubugtak sa Category 2 an sarong lugar kun saen igwa suboot presensya kan mga armadong grupo na pwedeng makiaram sa maabot na eleksyon.
