Kinumpirmar kan Hong Kong Drainage Services Department an 18 kaso nin pagbaha sa manlaen-laeng parte kan Hong Kong kabali an sarong paradahan sa Tseung Kwan O asin nagkapirang flood-prone areas sa Hong Kong Island.
Naggamit nin makabagong robotic technology an ahensya asin nakaresponde na sa 11 kaso nin baha pag abot nin udto.
Sa parte man nin King Yin Lane car park, haros 20 lunadan an lubog pa man sa tubig-baha, kabali na an sarong taxi na haros dae na mahiling an mga bintana. Walo sa mga lunadan an nawalat pa man sa lugar makalihis an pirang oras.
Nangapudan man an mga maysadiri kan lunadan sa gobyerno na i-upgrade an drainage system sa lugar tangani malikayan an mga siring na insidente.
Sigun ki Sai Kung District Councillor Christine Fong Kwok-shan, gumamit nin robot tangani kontrolon an tubig-baha sa parking lot asin maghagad nin tabang sa Fire Services Department tangani halion an mga na-stranded na lundaan.
Pigsuhestyon man ni Fong na ibali an parking area sa listahan kan flooding blackspots asin magpautob nin real-time flood monitoring system tangani makapagtao nin patanid sa mga motorista.
May nairehistro man na pagbaha sa Pik Sha Road sa Sai Kung asin sa Tin Hau Temple sa Hang Hau. Mantang sa Chai Wan, duwang ambulansya an na-stranded makalihis maraot an makina sa tahaw kan serye nin pag-baha sa slope harani sa Salesian School.
Kabali man sa mga apektado an Shau Kei Wan, kun saen nag abot sa ankle sa luwas kan Fortune Mansion, mantang knee-high na baha man an nairehistro sa luwas kan Quarry Bay MTR Exit A.
Sigun sa sarong lehisladro sa nasyon, bagaman makusog an uran, nagtitinir na kontrolado an sitwasyon sa Eastern District.
Nakapag-deploy na man an mga awtoridad nin 180 emergency teams asin nagsagibo nin inspeksyon asin clearing operations sa 240 drainage hotspots sa syudad.
Bukas man an Emergency Co-ordination Centre kan Home Affairs Department, na nagtugdok nin 8 paramientras na evacuation shelters para sa mga apektadong residente sa irarom kan Black Rainstorm warning.
