Gadan an nasa 18 katao makalihis an wildfires na nag bungkaras sa may southeastern region kan South Korea basado pa sa report kan local media kan nakalihis na aldaw nin Miyerkules, Marso 26.
Nagkapira sa mga binawian nin buhay iyo an pig porbarang makatakas gikan sa nag aalab na kalayo alagad nag baliktad an saindang piglulunadan, basado pa sa report.
Igwa nin 19 na indibidwal man an naireport na irido mantang labi pa sa 23,000 residente na an pig ebakwar asin ginatos an mga istruktura an nadanyaran.
Itinalaga man kan gobyerno kan South Korea an mga apektadong lugar komo special disaster zones.
Enot digde, nagpuon na mag kuriyat an nasambitan ng wildfires sa rehiyon kan nakalihis na aldaw nin Martes, Marso 25 na nagkawsa sa pwersahang pag ebakwar kan mga residente gikan sa saindang mga isataran asin tumupok na man sa mga pagtaraid na lugar.
Rinibong mga preso na man an pigbalyo kan mga awtoridad gikan pa sa mga kulungan.
Nag promisa man si Acting President Han Duck-soo kan pagpapadara nin mga firefighting helicopters asin ground personnel tangani apulahon an wildfires na mas malala pa huli sa makusog na duros asin tuyong panahon.
Mientrastanto, suspetsa man kan mga opisyal kan gobyerno kan South Korea na an rason kan nagkapira sa mga kansuarin sanang wildires kabali na sa may Uiseong asin Ulsan iyo an huli sa human error, posibleng huli pa sa paggamit nin kalayo mantang paglilinig an mga haralanglaw na awot sa mga sementeryo o posibleng nagbungkaras an kasulo gikan man sa welding work.
