Dae mababa sa 18 katawo an binawian nin buhay sa sarong stampede kan sarong istasyon kan tren sa India, New Delhi, kan nakalihis na Sabado nin hapon, Pebrero 15 kan magturuklangan an mga tawo na makasakay sa mga tren pasiring sa pinakadakulang festival sa kinaban na Kumbh Mela.
Piggaganap ini tuyong 12 taon sa Prayagraj, na nag-aakit sa milyun-milyong mga debotong Hindu.
Sigun sa mga report kan ororidad, an stampede an naganap kan magpumirit an mga deboto na makasakay sa mga tren pasiring sa nasambitan ng pista, na matapos sa Pebrero 26.
Pigladawan kan mga local authorities na an eksena an pinakama-peligro na nangyari sa istasyon kumparar sa mga nakalihis na taon.
Sigun man ki Dr. Ritu Saxena, Deputy Medical Superintendent kan Lok Nayak Hospital sa New Delhi, 15 katawo an nakumpirmar nang binawian nin buhay sa ospital.
Mientrastano, tolo an dugang na naireport na binawian nin buhay. Kadaklan sa mga biktima an mga kababaehan asin mga aki na naipit sa suruksukan.
Sigun pa sa sarong porter na nagtatrabaho sa istasyon kan trem puon pa kan nakalihis na taong-1981, dae pa kaini naeksperyensiya an siring na suruksukan.
Sinaysay man ni Railways Minister Ashwini Vaishnaw na sarong imbestigasyon an saindang pigsasagibo tanganing aramon an mga kawsa kan aksidente.
Pinagtibay kaini na an mga dugang na tren an iluluwas na gikan sa New Delhi tanganing mapawi an kadakol na mga pasahero partikularmente na sa aldaw kan festival.
Nagpahayag man nin pakikidumamay sa pamilya kan mga binawian nin buhay si Prime Minister Narendra Modi dapit sa nangyaring trahedya.
Pigsugo man ni New Delhi Governor Vinai Kumar Saxena, an disaster management personnel na mag-deploy asin siertuhon na an mga ospital an nakapreparar tanganing magsimbag sa mga pangangaipuhan kan publiko.
An Kumbh Mela an piggaganap tuyong anom na semanang pagtiripon, na igwang labi 500 milyong deboto na nagpapartisipar puon kan magpuon ini kan nakalihis na bulan.
Dae man maikakaila na an nasambitan ng kaganapan an igwang historya kan mga insidenteng igwang kinaaraman sa darakulang stampede, kaibahan na kan nakalihis na taong-1954 kun saen labi 400 katawo an binawian nin buhay, asin saro pa kan 2013 na ikinagadan kan 36 na katawo.
