NAGA CITY- Nagpakol sa haros 18,000 na mga miyembro kan progresibong grupo asin mga representante hale sa iba pang sektor kan sosyudad an nakisumaro sa pigkondusir na hiro protesta sa bilog na rehiyong Bicol suodma.
Sa entrevista kan Bombo Radyo Naga ki Vince Casilihan hale sa Bayan Bicol, sinaysay kaini na nag-abot sa 18,000 na persona an nakisumaro sa pigkondusir na mga hiro protesta asin mga aktibidad sa manlaen laeng mga lugar sa rehiyon.
Sa probinsya nin Masbate suboot an pinakadakol na mga nagpartisipar na nag-abot pa sa haros 7,000 persona.
Pangapodan man kan progresibong grupo hale sa rehiyong Bicol na maipautob na kan gobyerno an haloy ng pighahagad na P125 across the board nationwide na umento sa sahod.
Kinakaipuhan man suboot na mag-abot sa P750 an national minimum wage para sa mga obrerong Pinoy.
Mientrastanto, pigkikwestyon man ni Arvin Reolla, kan Kilusang Mayo Uno an sinasabi ni Labor Sec. Silvestre Bello na mayo sindang magigibo tanganing mapauntok na an contractualization o an inaapod na End of Contract (ENDO) sa Pilipinas.
Ini katakod kan sinaysay suboot ni Sec. Bello na mayong poder an Department of Labor and Employment (DOLE) pag-abot sa pag-aprubar asin pagbagat sa mga pigtutulod na ley na makakaapektar sa labor laws.
Sigon pa ki Reolla, garu pigtutugutan kan ahensya sa tabang kan ipinaluwas na department order no. 174 an indirect contractualization kun saen sa mga agency na nagkukua nin mga obrero.
Prangkang sinaysay man ni Reolla na garu mas naglala pa suboot ngonyan an contractualization na labi ng nakakaapektar sa hanapbuhay kan mga nagtitios na mga obrerong Pinoy.
