Dae mababa sa 19 katawo an mga binawian nin buhay makalihis magbagsak an military aircraft sa Omdurman, Sudan kan nakalihis na Martes, local time.
Sigun sa pahayag kan militar, an Antonov aircraft an nagbagsak mantang pa takeoff gikan sa Wadi Sayidna air base, saka nagbagsak sa sarong harong na makukua sa distrito kan Karrari kan Omdurman.
Pigkumpirmar man kan militar na kaibahan sa mga binawian nin buhay an pirang haralangkaw na opisyal kan saindang hanay, mga personahes kaini asin pirang sibilyan, alagad dae maaraman kun ano an kawsa kan pagbagsak kan eroplano.
Sigun man sa Ministry of Health, dadarahon an mga lawas sa Nau Hospital sa Omdurman.
Mantang limang sibilyan kaibahan an duwang aking magtugang an dinara sa ospital para sa kinakaipuhan na tabang medikal makalihis makapagtamo nin lugad.
Mientrastanto puon kan katahawan kan Abril 2023, an Sudan an nagsasairarom sa matinding giyera sa tahaw kan hukbong Sudanese asin kan Rapid Support Forces (RSF), na nagdara nin matinding epekto sa mga namamanwaan.
Sa record kan United Nations asin mga lokal na otoridad, labi sa 20,000 katawo an an binawian nin buhay asin pigkakalkulong 14 milyong tawo na an nag-ebekwar na nagbugtak sa nasyon sa bingit kan pagkawasak.
