NAGA CITY- Gadan an duwang aki makalihis na mahilo an sarong bilog na pamilya kan kinakan na tikong sa Barangay Bulalacao, Presentacion, Camarines Sur.
Sa entrevista kan Bombo Radyo Naga ki PS/Insp Emilio Endrano, hepe kan Presentacion-PNP, kinumpirmar kaini na binawian nin buhay an 2-anyos asin 5-anyos na aki kan mag-agom na sinda Marilyn asin Antonio Rosales makalihsi na magkakan nin tikong komo saindang pangudtuhan.
Sigon ki Endrano, hapon na kan makamate nin pangungulog kan saindang tulak an pamilya Rosales kabale na an apat na aki siring man an mag-agom kaya idinalagan an mga ini sa ospital alagad dae na naisalbar pa an buhay ninda Mark asin Anthony.
Napag-aram na mahigot na pigpapangalad kan Bureau of Fisheries and Aquatic Resources (BFAR) an pagkakan kan tikong huli sa pagkakaigwa kaini nin hilo na inaapod na tetrodotoxin.
Labi sa 1,000 na beses na nakakahilo an tetrodotoxin kumparar sa cyanide.
