NAGA CITY- Gadan na kan madiskobre an sarong 2-anyos na aking babae sa irarom kan tulay sa Calabanga, Camarines Sur.
Sa entrevista kan Bombo Radyo Naga ki PO2 Angelo Palayar, tagapagtaram kan PNP-Calabanga, sinaysay kaining pig-iba kan saiyang ama an biktima kan maghale ini sa saindang harong makalihis na mag-iwal ini asin an saiyang live-in partner.
Kan maaraman kan ina kan biktima na pig-iba kaini an saindang aki, tulos kaining piglapag an mag-ama kaibanan an nagkapiwa sa saiyang mga kaparyentes.
Pigtutubudan na mantang paparayo, pigwalat kan ama an biktima sa madiklom na parte kan Barangay Binaliw harani sa sarong irrigation canal pasado alas-11 subanggi.
Kinaagahan, nadiskobre na sana an bangkay kan aki sa irarom kan tulay harani sa parte kan Barangay Sta Cruz.
Posible suboot na nahulog sa irrigation canal an aki asin nadara nin sulog nin tubig sa nasambitang tulay.
Sa ngonyan, pighahalat pa kan PNP an resulta kan autopsy sa bangkay para maaraman ano an totoong ikinagadan kan biktima.
