NAGA CITY- Nagtitinir na sa kostudiya kan Philippine National Police (PNP) an duwang drug personality makalihis an pigkondusir na anti-illegal drug operation sa Buhi, Camarines Sur.
Binisto an mga suspek na sinda Mark Ed Sabio alyas Mac-Mac, 29-anyos asin si Bon Joeven Riño, 22-anyos.
Sa nagunong impormasyon kan Bombo Radyo Naga, napag-araman na pigserbe kan mga kabuhan kan PNP Buhi katabang an Philippine Drug Enforcement Agency (PDEA) Bicol an search warrant sa harong kan suspek na si Sabio sa Barangay Sta Justina.
Narekober digdi kan mga otoridad an pitong sachet na naglalaog nin pigtutubudang shabu asin mga drug paraphernalia.
Inabutan man kan mga otoridad sa harong ni Sabio an suspek na si Riño sa tahaw kan operasyon asin narekober digdi an sachet na naglalaog nin pigtutubudang shabu.
Inaandam na ngonyan an kasong pagbalgar sa RA 9165 o Comprehensive Dangerous Drugs Act of 2002 na isasangat laban sa nasambitang mga suspetsado.
