NAGA CITY- Arestado kan mga otoridad an duwang persona sa pigkondusir na anti-illegal drug operation sa banwaan nin Pasacao, Camarines Sur.
Binisto an mga nadakop na persona na sinda Oliver Bonifacio, 34-anyos asin si John Kevin Atacador, 25-anyos.
Sa nakuang impormasyon kan Bombo Radyo Naga, napag-araman na tulos suboot na pigdakop kan mga otoridad an suspek na si Bonifacio matapos na magositibo an pigkondusir na buy-bust operation laban digdi na nangyari sa barangay Odicon.
Makalihis an nasambitang operasyon, naaktuhan man kan mga kapulisan an suspek na si Atacador mantang naggagamit nin iligal na droga sa laog kan sarong kwarto sa Margando Farm sa parehong lugar.
Narekober kan mga otoridad sa duwang suspek an sampulong sachet nin pigtutubudang shabu asin mga drug paraphernalia.
Napag-araman man na parehong nagsuko na sa programang Oplan Double Barrel an nasambitang mga suspetsado na presenteng nagtitinir ngonyan sa kostudiya kan PNP Pasacao para sa maninigong disposisyon.
