(UPDATE) NAGA CITY- Tinawan doon kan manhamiento kan 9th Infantry Division, Philippine Army na dae ninda pigtotolerar an pagkakaimbwelto kan duwang miyembro kan CAFGU sa paggadan suboot sa sarong daraga sa probinsya nin Sorsogon.
Sa entrevista kan Bombo Radyo Naga ki Capt. Randy Llunar, head kan Division of Public Affairs Office (DPAO), sinaysay kaini na nagpapadagos pa an pigkokondusir na suway na imbestigasyon kan Philippine Army asin an pakikipagtabangan ninda sa mga kapulisan manungod sa pagkagadan sa daraga na si Diana Rose Aviso, 21-anyos.
Nagtitinir na sa kostudiya kan militar sinda CAA Martin Perenia asin CAA Romnick Almasco na pigtutukdong yaon sa likod kan krimen.
Sigon ki Llunar, mahigot man na pigpapangalad an magtinir nin magdamlag an sarong sibilyan sa laog nin mga patrol base para na man sa saindang seguridad.
Mientrastanto, sa suway man na entrevista ki Col. Joselito Pastrana, pamayo kan 22nd Infantry Batallion, sinaysay kaini na naghahanap pa sinda ngonyan nin testigo na posibleng makapagtao nin linaw sa pangyayari.
Nagtao naman suboot siya nin kasuguan sa commanding officer kan 903rd Infantry Brigade na nakakasakop sa pinangyarihan kan krimen sa kun ano an dapat na mga gibuhon mantang nagpapadagos pa an imbestigasyon kan mga otoridad.
Sigon ki Pastrana, isolated case sana an nangyari sa probinsya nin Sorsogon.
Tinawan doon man kan opisyal na posibleng mahale sa pwesto asin makulong an duwang CAFGU member enkaso mapatotoohan na sinda an yaon sa likod kan paggadan sa nasambitang daraga.
Marurumduman na nadukayan na sana an naaagnas ng bangkay kan 21-anyos na daraga sa laog kan kubo na sinasabing pagsasadiri ni Almasco asin pigtutubudan na nilugusan pa ini.
Napag-araman na kailusyon si Aviso kan saro sa mga pigtutukdong suspek sa krimen na si Perenia.
