NAGA CITY- Nahilingan nin danyos an duwang eskwelahan sa banwaan nin Nasugbu, Batangas makalihis an nagtamang 6.3 magnitude na linog sa probinsya suodma.
Ini an kinumpirmar ni Alex Pimentel, head kan Municipal Disaster Risk Reduction Management Office (MDRRMO) Nasugbu sa ekslusibong entrevista kan Bombo Radyo Naga.
Sigon ki Pimentel, nairehistro an mga minor damages sa Nasugbu West Central School asin sa Pantalan Senior High School.
Napasa suboot an mga jalousie windows asin igwa man nahiling na gatak sa pader kan nasambitang mga eskwelahan.
Apwera man sa nasambitang mga eskwelahan, mayo na suboot nairehistrong mga danyos sa iba pang mga public structures asin utility sa banwaan nin Nasugbu makalihis an pagyugo yugo nin daga.
Mayo man suboot nairehistrong mga nag-ebakwar asin dae man nagpanic an mga residente kan nasambitang banwaan makalihis an makusog na linog suodma.
Sigon ki Pimentel, dawa na sa Nasugbu an epicenter kan linog, maikokonsiderar man na maswerte sinda huli ta maluya sana an namatean nindang pagyugo yugo nin daga.
Sa ngonyan, padagos pa nanggad an pigkokondusir na assessment asin monitoring kan saindang opisina katakod kan nagtamang 6.3 magnitude na linog sa nasambitang banwaan.
