NAGA CITY- Arestado an duwang indibidwal makalihis an pigkundusir na buy bust operation kan mga operatiba sa siyudad nin Naga.
Sa entrevista kan Bombo Radyo Naga ki PSSG. Roberto Aguillon, Assistant PIO kan Naga City Police Office, sinaysay kaini na an nasambitan ng duwang suspek an pigkokonsederar komo mga high value individuals orog na ta sinda an mga suppliers kan iligal na droga.
Sigun ki Aguillon, subject for forensic examination pa an nakumpiskar na shabu tanganing maaraman an gabat kaini.
Apwera sa iligal na droga, nakumpiskar man gikan sa duwa an duwang badil kun kaya mahahampang pa an mga ini sa kasong illegal possesion of firearms.
Sa paenot na imbestigasyon kan nasambitan ng hepatura an mga suspek an gikan pa sa Minalabac asin Bula asin deriktang nagbabagsak nin droga sa siyudad nin Naga.
Katakod kan insidente liwat na pigsierto kan opisyal na dagos-dagos an saindang pigsasagibong mga operasyon tanganing mapugulan an pagkuriyat pa kan mga pigpapangalad na bulong sa Naga City.
Ini an komo pag-utob pa sa kasuguan kan alkalde kan siyudad na higutan asin siertuhon na dae makakalaog an anuman na klase kan iligal na aktibidad sa lugar.
Sa ngunyan, nasa kostodiya na kan mga otoridad an duwang suspek asin mahahampang sa magkakanigong disposisyon.
