NAGA CITY- Gadan an duwa sa mga pigtutubudang miyembro kan mga rebeldeng New People’s Army makalihis an nangyaring engkwentro sa Barangay Taopon, Panganiban probinsya kan Catanduanes.
Sa entrevista kan Bombo Radyo Naga ki Maj. Ricky Anthony Aguilar Chief kan Division Public Affairs Office (DPAO) kan 9th Infantry Division Philippine Army, sinaysay kaining pasado ala 1:30 nin mag-uumagahon kan Domingo kan mangyari an engkwetro sa pagultanan kan tropa kan 83rd Infantry Battalion (83IB), Police Mobile Force asin pitong mga dae pa nabibistong miyembro kan mga rebeldeng grupo.
Segun sa opisyal, naghaloy nin labi 10 minuto an nasambitan ng pangyayari na nagresulta sa pagkagadan kan duwa sa mga miyembro kan rebeldeng grupo alagad mayo man nairehistrong casualty sa parte kan mga militar.
Narekober man sa mga ini sa AR15 riffle na sinasabing ginamit sa nasambitan ng engkwentro.
Sa ngonian, padagos pa an isinasagibong hot pursuit operation kan mga otoridad dapit sa nasambitan ng pangyayari.
Mientrastanto, liwat man na iningkaminar kan opsiyal an mga miyembro kan mga rebeldeng grupo sa rehiyon asin sa nasyon na magbalik loob na sa gobyerno, huli ta dakol suboot na programa an gobyerno arog kan Enhanced Comprehensive Local Integration Program (E-CLIP) asin iba pa an nakaantabay sainda enkaso bayaan na kan mga ini an rebeldeng grupo.
