Opisyal nang nagsumpa si Carlos Yulo bilang Petty Officer 1st Class kan nakaaging Lunes sa PH Navy headquarters.
Sigun sa Pinoy Gymnast, orgulyo niya na natawan siya nin siring na pribilehiyo na makapalista sa PH Navy Reserve Force, sarong recognition na dae niya inaasahan.
Dugang pa ni Yulo na proud siya sa pagsulot kan uniporme kan PH Navy asin nagpasalamat man siya sa Navy sa prestihiyosong pagbisto.
Sinabi ni Yulo na saiyang susuportaran an mga core values kan Navy asin matao nin inspirasyon sa mga jovenes na ipapahiling sa paagi kan sports, asin kaya man nindang makapagserbi sa satuyang nasyon.
Sa mensaheng ipinaabot ni Philippine Navy Flag Officer in Command, si Vice Adm. Toribio Adaci Jr., pig-omaw niya an golden boy asin tinawan niya nin kumpyansa na gigibuhon ni Yulo an kaparehong dedikasyon, disiplina na ipinahiling kaini bilang reservist para magin kampeon sa world stage, kaibahan an mga kababaihan asin kalalakihan kan PH Navy na nagtatao kan saindang buhay tanganing protehiran an nasyon.
Magigirumdoman na si Yulo an nagdara nin duwang medalya sa floor exercise asin vault apparatus sa Gymnastics sa 2024 Paris Olympics.
