NAGA CITY- Salbado na an kamugtakan kan 20 mga pasahero nin sarong bus makalihis na maaksidente asin nagtagilid pa nin dikit sa banwaan nin Sipocot, Camarines Sur.
Sa entrevista kan Bombo Radyo Naga ki SPO3 Albert Joven, tagapagtaram kan PNP Sipocot, sinaysay kaini na nawaran nin kontrol sa minamanehong pampasaherong Philtranco bus an driver kaini na si Richard Bonito, 33-anyos mantang binabagtas an tinampo sa barangay Manangle, alas-11 nin banggi suodma.
Mahalnas suboot an tinampo sa nasambitang lugar huli naman sa haros magdamlag na pag-uuran kaya nagpagewang gewang asin nagtagilid pa nin diit an bus makalihis na mahulog an rida kaini sa sarong drainage canal.
Tulos man na pigdalagan sa Sipocot District Hospital an 20 mga pasahero kan bus asin presenteng nagpaparahay na sana kan pigsapo nindang lugad sa lawas.
Mientrastanto, siyam pa man na mga pasahero kan bus an nagtitinir suboot sa ospital.
Napag-araman na hale sa Northern Samar asin patungo kuta na sa Metro Manila an bus na igwang lunad na 31 mga pasahero kabale na an driver asin konduktor kaini.
Sa ngonyan, nagtitinir na sa kostudiya kan PNP Sipocot an driver kan nasambitang bus mantang padagos pa an saindang imbestigasyon katakod kan pangyayari.
