NAGA CITY- Nagin matrayumpo an pigkundusir na 2025 Bicol Regional Scouts Jamboree sa Ligao, Albay.
Sa entrevista kan Bombo Radyo Naga ki Enrique Bisenio, Youth Development Officer III, Boy Scouts Bicol Regional Coordination Office, sinaysay kaini na pigkundusir an nasambitan ng aktibidad kan nakalihis na Marso 5 hasta 9, 2025 sa Provincial Campsite and Evacuation Center kan Ligao, Albay.
Katakod kaini, nagin marhay soboot an resulta kan event nin huli ta kadakol an nanudan kan mga estudyante siring na sana kan typhoon tracking, life skills, rescue asin iba pa na kaipuhan na marhay sa presenteng panahon.
Nagpakol man sa haros 5, 932 an partisipantes na gikan pa sa manlaen-laen na lugar sa Rehiyong Bicol.
Sigun ki Bisenio, apwera sa mga life skills pigtukduan man an mga scouts na iluwas an saindang mga natatagong talento asin paghasa sa sainda na nagin marhay na tawo.
Kabali digde an pagdidisiplina nin tama sa paagi kan pagkaulay sa mga kaakian na nahihilingan nin bakong marhay na pag-uugali asin pagbabasabot sa mga ini na importante na magkaigwa nin marhay na pagbabago sa saindang mga sadiri.
Dugang pa kan opisyal sa paagi kan Bicol Regional Scouts Jamboree nadedevelop an social skills kan mga kaakian sa paagi kan pagpartisipar sa manlaen-laen na gibuhon asin pagheheras kan saindang mga ideya sa iba.
Sa ngunyan, pinasalamatan na sana kan opisyal an mga personahe kan Ligao magin an Provincial Government kan Albay para sa saindang bilog na suporta sa aktibidad.
