NAGA CITY- Naisalbar na an 21 gikan sa 22 Pilipinong seafarers na lunad kan MV Tutor na inatake kan Houthi rebels mantang naglalayag sa Red Sea.
Ini an pigkumpirmar ni Migrant Workers Secretary Hans Leo Cacdac sa sarong pulong balitaan kan Sabado.
Soboot, ni-rescue kan combined international forces an 21 Pilipinong seafarer gikan sa barko asin inilipat sa security forces ship saka dinara sa salbadong pantalan.
Dae naman na idinetalye pa kan opisyal an presenteng kinamumugtakan kan mga pigsalbar na Pilipinong tripulante para sa security reasons alagad pigsierto kan opisyal na salbado na an mga ini.
Mientrastanto, sinaysay ni Cacdac na padagos an paghahanap sa saro pang Pilipinong seafarer makalihis an pag-atake na nagtitinir soboot na nasa laog kan barko. Masagibo soboot nin salvaging operation sa barko asin mabwelta an grupo tanganing hanapon an nawawarang seafarer.
Marurumdoman na kan aldaw pa nin Miyerkules nangyari an insidente kun saen inako kan Houthi rebels an pag-atake sa nasambitan ng barko.
An pag-atake kan Houthis sa international shipping sa Red Sea region puon pa kan Nobiyembre 2023 an komo pakikisumaro sa mga Palestino na naiipit sa giyera sa pag-ultanan kan saindang kaalyadong Hamas kontra sa Israel.
