NAGA CITY- Arestado an sarong barangay kagawad asin an duwang iba pa makalihis an pigkondusir na anti-illegal drug operation sa ciudad nin Iriga.
Binisto an mga suspek na sinda kagawad Allan Alanis kan barangay San Nicholas; Aldrin Cadag asin Oliver Onedo.
Sa entrevista kan Bombo Radyo Naga ki P/Supt. Alex Pederio, hepe kan Iriga City PNP, sinaysay kaini na nadakop an mga suspek na sinda Alanis asin Cadag makalihis an pigserbeng search warrant sa mga harong kaini sa barangay San Nicholas.
Narekober sa pag-iingat ni Alanis na pigmimirar na high value target kan mga kapulisan an sarong sachet nin pigtutubudang shabu na maabot an gabat sa 150 grams, bala para sa calibre 45 badil asin an mga drug paraphernalia mantang nakumpiskar man sa pag-iingat ni Cadag an duwang sachet na naglalaog nin shabu.
Sigon ki Pederio, an barangay kagawad na si Alanis an supplier nin iligal na droga sa nasambitang ciudad siring man sa iba pang mga pagtaraid na banwaan.
Enot naman suboot na nagsuko an opisyal sa mga kapulisan alagad nagbwelta ini sa saiyang iligal na transaksyon.
Mientrastanto, pigserbe man sa harong ni Onedo sa barangay Sto Domingo sa parehong ciudad an search warrant.
Nakumpiskar digdi an sarong granada asin apat na sachet nin pigtutubudang shabu.
Nagtitinir na ngonyan sa kostudiya kan mga otoridad an nasambitang mga suspek mantang pig-aandam na an kasong isasangat laban sa mga ini.
