Aram baya nindo mga ka-bombo, si Efecan Kultur, sarong Turkish Tiktoker na nabisto huli sa saiyang content na mukbang an mamundong binawian nin buhay sa edad na 24-anyso huli sa mga komplikasyon dara kan labing katabaan.
An mukbang trend an nauuso kun saen an mga tawo an nagkakakan nin kadakol na pagkakan sa hampang kan camera tanganing makaguno nin kadakol na viewers.
An Mukbang an orihinal na gikan sa South Korea alagad marekas na nagkuriyat sa bilog na kinaban. Kasabay kan paglakop na ini, nagin pangenot man na problema an dapit sa obesity asin pagsasayang kan pagkakan.
Susog sa report si Kultur an igwang 156,000 TikTok followers asin 12,000 Instagram followers, na nagin rason tanganing saro ini sa magin pamosong mukbang streamers sa Turkey.
Mantang nagsasagibo ini kan nasambitan ng mukbang, padagos man ining naglolobo na nagresulta tanganing magsapo nin manlaen-laen na problema sa salud kabali na an helang sa puso kan nakalihis na October 2024.
Katakod kaini, pig-anunsyar man kan 24-anyos na Tiktoker na mapuon na ini sa pag-diet asin malikay sa labing maaskad na pagkakan.
Alagad, kasuarin sana si Kultur an binawian nin buhay huli sa labing katabaan.
Sa ngunyan, liwat man na nangapudan an mga health expert sa publiko orog na sa mga social media influencer na pangataman an saindang salud asin magin magayon na ehemplo para sa iba sa pagproteher kan lawas.
