Pig-iimbestigaran kan Philippine National Police (PNP) an 24 dating PNP Chief katakod kan alegasyon na saro sa mga ini an nagtabang sa dismissed Bamban, Tarlac Mayor Alice Guo na makadulag sa Pilipinas karibay nin dakulang kantidad nin kwarta.
Ini an sinaysay ni PNP chief Police General Rommel Marbil sa hearing kan Senate finance subcommittee sa prosopwestong P205.8-billion na budget kan PNP para sa 2025.
Mawot man kan PNP an paliwanag kan PAGCOR Senior Vice President Raul Villanueva, sarong retiradong heneral asin dating kumander kan Intelligence Services Armed Forces of the Philippines (ISAFP).
Sinaysay man ni Marbil na nag-ulay na sinda ni DILG Secretary Benhur Abalos tanganing imbestigaran bako sana an mga dating hepe kan PNP kundi an gabos na nagtabang ki Alice Guo na makaluwas sa nasyon.
Enot kaini, sa hearing kan Senado kan Martes, sinabi ni Villanueva na may mga intelligence reports na nag-validate na sarong dating hepe kan PNP an imbwelto sa pagdulag ni Guo asin parte pa ini kan “monthly payroll.”
Tinawan duon ni Marbil na dae man na-verify an impormasyon na pigbuyagyag ni Villanueva, na nakakaapektar sa imahe kan PNP.
Sigun ki Marbil, nagsusurat sinda nin surat na naka-address ki Villanueva na nag-aaghat saiya na ibisto an pigtutukoy kaini sa hearing kan Senado.
Enkaso dai mapangaranan ni Villanueva an nasabing ex-PNP chief, sinaysay ni Marbil na kakapotan kan PNP-Criminal Investigation and Detection Group (CIDG) an bagay na ini.
