NAGA CITY- Irido an 26 na persona makalihis an magkasuway na aksidenteng nangyari sa banwaan nin Tigaon, Camarines Sur.
Sa entrevista kan Bombo Radyo Naga ki PC/Insp. Ariel Blanco, chief of police kan PNP Tigaon, sinaysay kaini na alas-3:45 nin mag-uumagahon ngonyang Marso 16 kan mawaran suboot nin kontrol an driver kan Raymond bus mantang binabagtas kaini an mahalnas na tinampo sa barangay Salvacion sa nasambitang banwaan.
Enot na nagsalpok sa sarong poon nin kahoy an nasambitang bus antes kaining araduhon an duwang harong.
Maswerte man na mayong nairido sa nakaistar sa nasambitang mga harong mantang nagsapo man nin minor injuries an lunad kan bus.
Mientrastanto, nagtagilid man an sarong jeep sa parehong lugar suodma makalihis na mawaran nin kontrol an driver kaini sa lunadan.
Sigon ki Blanco, pasiring kuta na sa banwaan nin Sañgay an nasambitang jeep kan maaksidente an mga ini sa barangay Salvacion sa parehong banwaan.
Nagsapo nin minor injuries an 12 pasahero kan jeep na tulos man na pinabulong.
Marurumduman na kan nakaaging Pebrero 28, sarong pampasaherong bus man an ditan pang mahulog sa sarong tulay sa parehong barangay.
Katakod kaini, nagpagirumdom man an PNP sa mga drivers na mag-ingat sa pagmamaneho huli naman ta peligroso an nasambitang lugar urog na kun mauran.
