NAGA CITY- Dakula an naiaambag sa ekonomiya kan banwaan nin Pili, Camarines Sur an 28 resorts na makukua sa saindang lugar.
Sigun ki Pili Mayor Tom Bongalonta Jr, nagpapamarhay asin nagpapasigla sa lokal na ekonomiya kan Pili an pagdagsa kan mga turista siringman kan saindang mga residentes sa magagayon na resort sa saindang banwaan.
Sa paagi kaya kaini, nadudungan man an kita kan banwaan asin naipapabisto pa an kultura kan mga taga-Pili na dakulang bagay para sa pagpapapusog sa turismo.
Dugang pa kan alkalde, ngunyan na naeeksperyensiyahan an labing init kan panahon piglalaoman talaga an pagbulos kan kadakol na mga tawo na mapasiring sa mga resort tanganing mapreskuhan an mga lawas.
Tamang-tama soboot an saindang lugar nin huli ta nagtatangro ini nin mga malilinig asin mapreskong tubig na siertong pighahanap kan magkakapamilya o magkaka-amigo.
Katakod kaini, pigsierto man ni Bongalonta na regular na pig-iinspeksyon an mga resort tanganing mamantinir an kasalbaduhan kan mga yaraon sa lugar.
Sa ngunyan, pig-enkaminar na sana kaini an publiko na enkaso mabisita sa manlaen-laen na lugar siertuhon na nagsusunod sa mga panundunan tanganing dae mabugtak sa alanganin na sitwasyon.
