Pig-orgulyo kan Department of Social Welfare and Development (DSWD) na igwang nakaantabay na labi duwang milyon na kahon kan mga family food packs (FFP) an ahensya enkaso kaipuhan kan mga lokal na gobyerno para sa mga disaster and response operations.
Sigun sa Disaster Response Management Group (DRMG) asin Spokesperson Assistant Secretary Irene Dumlao, an duwang milyon na kahon kan FFP an nakapreposisyon sa manlaen-laen na bodega kan DSWD sa nasyon.
Sigun pa digde, na an mga family food packs an padagos na piggigibo tanganing masierto an pagtatao nin mga tabang saen man lugar enkaso magkaigwa nin kalamidad o emerhensya.
Susog sa pinakahuring datos gikan sa Disaster Response Operations Management, Information and Communication (DROMIC), igwa nin labi sa 200,000 na kahon kan FFP an nakabugtak sa DSWD National Resource Operations Center (NROC) sa ciudad nin Pasay.
Napag-araman na sa Visayas Disaster Resource Center (VDRC) sa Mandaue City, Cebu nakatambak an 247,765 na mga family food packs (FFPs).
An mga ini an nakapreparar na idistrebwer sa mga LGUs enkaso kaipuhan.
Katakod kaini, apwera sa NROC asin VDRC, igwa man an DSWD nin iba pang mga storage facilities sa manlaen-laen na rehiyon na igwa man nin mga prepositioned FFPs asin preparado na magsimbag sa mga pangangaipo kan mga LGUs sa panahon nin mga kalamidad.
Mientrastanto, pigtawan-duon pa ni Sec. Dumlao na pirmi kaining pigsisierto na igwa nin bastanteng FFPs lalo na an disaster response para sa Super Typhoon Julian, pagtuga kan Kanlaon, asin iba pang mga dae pa sana nahahaloy na kalamidad.
