Nagkasundo an Department of Budget and Management (DBM), Department of Human Settlements and Urban Development (DHSUD), asin Metropolitan Manila Development Authority (MMDA) na magtarabangan para sa mas mahewas asin mas dakulang pagpapahewas kan mga green public spaces sa bilog na nasyon sa irarom kan Green Green Green Program.
An pinagsarong obheto an pagkriar kan mas kas kadakol na mga lugar kun saen pwedeng magpahingalo, magkawat asin mag-enjoy an mga mamamayan sa luntiang kapalibotan.
Sinda DBM Secretary Amenah Pangandaman, DHSUD Secretary Jose Ramon Aliling, asin MMDA Chairman Romando Artes, nagpirma sa sarong Memorandum of Understanding tanganing pormal na maisakatupadan an implementasyon kan Fiscal Year 2025 Local Government Support Fund.
An pondong ini an nakatagama tanganing tabansgan asin suportaran an mga lokal na gobyerno sa saindang mga paghihingowa na pagayunon asin mantiniron an mga sustainable na komunidad sa paagi kan pagpapatindog asin pagpapakusog kan green infrastructure.
An sakop kan programa an kinababalihan kan pagpapatindog, pagpapa-uswag asin rehabilitasyon kan manlaen-laen na klase kan public parks, botanical gardens, river esplanades, asin iba pang pasilidad na obhetong enkaminaron an active mobility.
Kaibahan digde an pagbubugtak kan mga bicycle lanes para sa mga nagbibisikleta, footpaths o mga agihan para sa mga naglalakaw, asin mga sports facilities para sa mawot na mag-ehersisyo asin magkawat.
Obheto kaining magtao nin alternatibong paagi kan transportasyon asin libangan para sa publiko.
Igwang kabilogang P700 milyon na pondo an pigtagama sa irarom kan 2025 General Appropriations Act (GAA) para sa tulos na pagpapautob kan programang ini.
