NAGA CITY- Arestado an tolong persona makalihis na maaktuhan na naggagamit nin iligal na droga sa Tiaong, Quezon.
Binisto an mga suspek na sinda Patrick John Chu, 35-anyos; Mari Key Mendoza, 30-anyos asin Jennifer Ellavera, 24-anyos.
Enot na nadakop sa buy-bust operation an suspek na si Chu makalihis na makabakal nin sachet kan pigtutubudang shabu an mga kapulisan digdi.
Naaktuhan man an duwa pang suspek mantang naggagamit nin iligal na droga.
Nakumpiskar kan mga kapulisan sa mga suspek an walong sachet kan pigtutubudang shabu asin mga drug paraphernalia.
Sa ngonyan, nagtitinir na sa kostudiya kan mga kapulisan an nasambitang mga suspek mantang inaandam na an kasong pagbalgar sa RA 9165 o an comprehensive dangerous drugs act of 2002 na isasangat laban sa mga ini.
