NAGA CITY- Tolong persona na an kumpirmadong gadan mantang saro man an kritikal pa sa ospital makalihis na magkakan kan pigpapangalad na tikong o butete sa banwaan nin Siruma, Camarines Sur.
Sa entrevista kan Bombo Radyo Naga ki Nonie Enolva, tagapagtaram kan Bureau of Fisheries and Aquatic Resources (BFAR)- Bicol, sinaysay kaini na tolong miyembro kan pamilya Alano na hale sa barangay Cabugao sa nasambitang banwaan an kumpirmadong binawian na nin buhay.
Kritikal pa nanggad sa ospital an padre de pamilya na sinasabing napiritan sanang magkakan nin butete makalihis na maaraman na nahilo an saiyang mga aki.
Sigon ki Enolva, padagos pa nanggad an imbestigasyon kan saindang ahensya katakod kan pangyayari.
Tinawan doon man kan BFAR-Bicol na mahigot na pinapangalad an pagdakop, pagpapabakal asin an pagkakan kan sirang tikong o butete.
